عمار يا شعب مصر !!!ز

السلام عليكم

يمكن أنا الأيام دى مش فاضى خالص عشان امتحاناتى كمان 6 أيام ، بس بجد أنا واصل لدرجة من الاستفزاز تخلينى لازم أكتب عشان ميجيليش شلل

اللى استفزنى مواقف شوفتها اليومين اللى فاته دول....حقولكم عليها وأنتم أحكموا

يعنى لما يبقى لسة من مفيش شباب ميت غرقان فى إيطاليا وتركيا واليونان ..... تلات مراكب غرقانة بشباب مصرى

ولسة النهاردة أسعار المازوت زايدة بنسبة 100% بقرار من الحكومة وده حيأثر على حاجات كتير زى ما عرفت من بابا منها أسعار الشقق (أصل بابا مهندس مدنى) عشان ده وقود لأفران الطوب فالطوب غلى طبعاً (والله الدفعة المنحوسة دى، أول ما قربت تتخرج وتفكر فى الجواز كل حاجة بتغلى .... من كام أسبوع الدهب غلى وقبلها كانت الشقق غليت مرة عشان قرارات المحافظ فى المحليات ودولوقت الشقق بتغلى لتانى مرة فى سنة واحدة عشان الحكومة طقت فى دماغها تغلى المازوت ..... الله يسهلكم يا شباب)

ده غير أزمة العيش اللى بقالها بتاع شهر ونص ولا شهرين وبتكلموا عنها فى كل حتة (مجلس الشعب وبرامج الفضائيات والصحف المعارضة والقومية و......) وواضح إنها حتزيد بعد قصة المازوت دى

والشباب المبروك اللى هاجر إسرائيل واتجوز من الصهاينة واللى وصل عدده مش عارف 14 ألف كده ولا كام واحد (كانوا جايين امبارح فى الأهرام والله بس مش فاكر العدد بالظبط) واللى لسة بيدافعوا عن الفكرة الوطنية العظيمة دى

وكان لسة السفارة المصرية فى نيجيريا معمول عليها سطو مسلح

الحاجات اللى أنا بقولها مش مشاكل مزمنة ولا حاجات بقالها 500 سنة عشان نقول الناس اتعودت عليها...دى حاجات قريبة أوى ولسة قائمة

كل ده بقى (وأهمه الشباب اللى راحوا فى البحر دول) وتلاقى ألوف قاعدين يرقصوا ورا المنتخب وهو رايح يلعب ماتش ودى فى أسوان وألوف أهلاوية زعلانين أوى إن الأهلى النهاردة طلع من كاس مصر والزملكاوية فرحانين فيهم وبيطلعلهم لسانهم وبرامج تعمل حوار طويل عشان تناقش حلول الكابتن حسن شحاته فى ظل غياب بركات وميدو وبرامج بتناقش بمنتهى الاهتمام هما اللى غرقوا دول ممكن نقول عليهم شهداء ولا دول خارجين عن القانون !!!!!! ولما المنتخب يجيب جون فى نامبيا (أهو لسة جاى من 20 ثانية) المعلق يقولك "فرحة كبيرة فى المدرجات، شوف الفرحة المصرية الجميلة" ولما يعملوا استفتاء فى برنامج العاشرة مساءاً عن أحزن يوم فى سنة 2007 يقولوا يوم ما الأهلى خسر من النجم الساحلى !!!!!!....... إيه الهببببببل ده

عارف انت لو واحد ولا اتنين ولا عشرة ولا ألف هما اللى بيعملوا كده، كنا قلنا الموضوع مش عام يعنى، لكن كل العدد ده فى ظل الظروف دى يتصرفوا كده ...... ده اسمه سفه

نفس الكلام فى سنة 2006 لما حصلت كارثة العبارة و أكتر من ألف واحد دمهم راح ...... ملايين طالعين يرقصوا فى كل الشواراع عشان مصر خدت كاس الأمم الأفريقية

ما تاخد مصر كاس الأمم ولا يطلع الأهلى من كاس مصر ولا تقولوا شهداء ولا متقولوش...إيه اللى حيحصل يعنى

أنا مش فاهم الشعب المصرى ده وصل لمرحلة إيه دلوقت

يعنى هل احنا مش حاسيين ببعض ولا احنا بقى عندنا حالة تبلد من كتر المشاكل والمصايب ولا كل واحد بقى مش هامه غير نفسه وبس بغض النظر بقى عن اللى بيحصل للناس التانية ويكاش تولع

بصراحة أنا مش عارف أجاوب

على فكرة أنا مش نكدى ولا متشائم....يمكن ممكن تسألوا صحابى إنى مش كده

وكمان أنا مش خلى الوفاض من التصرفات الخاطئة ولا كل تصرفاتى نموذج يعنى

أنا أهلاوى وكنت فرحان برده لما مصر خدت كاس الأمم وزعلت لما الأهلى خسر بطولة افريقيا وساعات برده الواحد بيضحك ويهزر ويرفه عن نفسه وكل حاجة

بس مش لدرجة إن يبقى أحزن يوم عندى فى السنة لما الأهلى خسر البطولة ومش لدرجة إنى ماحسش خالص كده باللى بيحصل حواليه حتى لو أنا ظروفى كويسة الحمد لله ومفيش حاجة من دى أثرت عليا شخصياً....أنا مش ضد الفرحة، بس يبقى لكل مقام مقال

إنما بصراحة التصرفات الجماعية بالشكل ده مستفزة جداً جداً

وأهو لسة كاس الأمم جاى وشوف اللى حيحصل

مش عارف بصراحة هل البوست ده له قيمة ولا لأ....بس أظن إنى كان لازم أكتب عشان ماطآش

ويمكن يكون حد له رأى تانى أستفيد منه