How to write a CV :D

صديقي الشاب العترة المجدع... صديقتي الشابة (كلمة كده بكرهها ومش ححطها على البلوج)...

اذا كنتم وكنتن قد انهيتم وانهيتن ....

(لامؤاخذه حاتكلم بصيغة واحدة وابقوا قسموها انتوا علي بعض وماحدش يحف)

دراستكم بدءا من شباب الدبلون وانتهاء بجامعتنا المحروسة المنحوسة.. معقبين بفترة الجيش الخيش.... او انتظار فارس الاحلام اللي ما بيجيش

ظانين بذلك ظن السؤ بان الحياة في العناب, والمية غليت وع التلقيم يا حاج, وان الشغل علي افا من يشيل

فاسمحولي ... الحدوتة عكس عكاس خالص .. مش لشكي –لا سمح الله – ف الافا اللي هيشيل ..لا.. انا ثقتي في الافا المصري ثقة عمشاء .. انما الشغل مش بس افا..... الشغل C.V !

فازاي نضرب C.V محترم نخش بيه علي اجدعها مدير او صاحب شركة .. وانتو يا ولداه ما تعرفوش الفرق بين الاتش ار مانجير وسحلجي الفرن البلدي.... خليكوا معايا وكل واحد يجهز ورقتين وقلم ... ابدأ

اول بند هيضبش في خلقتك هو العنوان , ويجب ملاحظة تزبيط عنوان ذواتي من عينة شارع النباتات , جاردن سيتي .. شجرة الدر الزمالك .. كدة يعني , انما هتعيشها بقي حكر ابو دومة وبير ام سلطان .. علي عيني وراسي بس انسوا بأه

ثانيا تلفون البيت , حط نمرة اي عيادة بالمنطقة اللي هتظبطها... يليها الموبيل ... اركن لحظة بقي .. هنا هنظبط نمرتين .. واحدة فناناتي من نظام زيرة عشرة ويليها سبعة ارقام زي بعض ثم نمرتك بالتبني اللي مافيهاش رقم يشبه اخوه ... ليه؟

دة له تأثير في المتلقي .. يقولك الواد دة او البت دي ولاد ناس... نمرهم متكلفة... اي نعم لما هيتصلوا هيتحلقلهم فيجربوا علي التانية ساعتها قول انك لسه بايعها او متبرع بيها... اللي بعده...

ابعد بقي عن الياهو والهوت ميل ما تستبيئش روحك حط علي اي سايت تاني ثم اسم السيادة ودة – لاسف- مضطرين نسيبه زي ما هو مع رجاء التخلي عن النعرات العائلية شوية .. يعني بلاش الافتخار اوي بالقاب من عينة النتن والجعر!!

خش بقي علي البيرسونال داتا.. او المعلومات "السخصية ".. تاريخ الميلاد .. خليك مميز.. يعني يومك زي شهرك- ماطلعتلوش شمس علي راي امي- يعني مولود في شهر واحد تبقي 1\1 تبقي 12\12 وهكذا ولو حصل واتعينت -ابقي قابلني - ولقوا اختلاف في شهادة الميلاد قول ان يوم الولادة غير يوم التسجيل.

الجنسية .. يا عيني بقي لو كتبتها امريكاني ... اوعي وشك.. حتقولي طب ازاي ... يا عمي بسيطة ليك اخ اتولد هناك وطبقا لقانون الجنسية الامريكي لما يوصل سنه 18 سنة ينقلهالك زي الفيروس تمام ويبقوا يدورا وراك بقي.

الحالة الاجتماعية ... اعزب علي طول الخط .. اسمعوا كلامي وما تقطعوش رزقكم بايديكوا .

يلي ذلك التعليم واللي اتعلموه .. حتقضيها جامعة القاهرة والمنوفية وما شابه .. يبقي تسيب القلم وتقوم ..انتوا مش وش نعمة.. هتقولي طب ازاي ..اكتب جامعة 6 اكتوبر .. مصر للعلوم... الجامعة الالمانية كدة يعني... هتقولي ما هو هيطلبوا اصول الاوراق ... يا اخوانا بس امضوا العقد وتفرج بعد كدة ... اللي خايف يخليه!!!

نخش علي الكبيرة بقي سجل اعمالك فيما مضي.... اشتغلت فين يعني..؟؟؟؟

انا عارف انه سجل اسود ومايشرفش... لكن ابدأ من الاحدث للاقدم.. اول هام تبعد عن اي مؤسسات او هيئات كبري يسهل التاكد من خلالها من صحة انتسابك اليها من عدمه ... يعني ايه كدة..؟

يعني ما تسقطش علي موبينيل ولا ميكروسوفت وتكتبلي مثلا انك كنت ماسك التكنيكال سابورت عندهم... انما – ودة تاني هام- عليك وعلي الشركات الصغيرة المتعددة المقار ... قلبك مش مطاوعك ومقلق يسالوا برضه ؟! اذن عليك بالفبركات.. يعني مثلا شركة اسمها صن باور تبقي شغالة في البوتاجازات ... ايس باور تبقي تكيفات وهكذا... وحط نمر اصحابك اذا حد اتصل (بس لو اصحابك باعوك انا ماليش دعوي)

بالنسبة للتيتل او المسمي لوظيفي لسيادتك هناك – شفت اهو جه اليوم اللي بقالك فيه تيتل اهو- عندك كام بق من الابقاق اللي ماشية في البلد اليومين دول وماحدش فاهم منها حاجة ...كذا كذا كذا سوبر فيزر (الحمها فيها علي بق واحد)... كذا كذا ادفيزر .. وكله ماشي .. يلي ذلك الكمبيوتر وخبراته, وجدير بالذكر انك لما تقعد في الانترفيو ويجي ذكر الكمبيوتر بالخير .... راعي ''الخنفان'' اكرر

" لخنفان" فقل كوم-يوتر ولا تقل كومب-يوتر, خليكوا ولاد ناس وانسوا المحشي والبرنجان ابو خل شوية.

يلي ذلك الغات .. امتلئ فخرا وعزة واباء بأن لغتك الام هي العربية ..! عربية كام سلندر بقي ...؟ دة علي حسب قرايتك واطلاعك وان كنت متأكد ان 90% من شبابنا لغتهم ما تحصلش التوك توك!!

يليها .. ايوة كنت عارف انكوا هتقعوا في الكمين .. اوعي حد يكتب الانجليزية.. بلاش رطرطة ارشق في لغة محدش من لجنة الممتحنين يستجري يبم معاك فيها.. خش علي الاردي.. السواحلي ... الزولو ... انما انجليزي .. دة النهاردة قرص العجة مكتوب عليه وان باوند!!!

واخيرا كورساتك يا معلم .. اي كورس دخلت فيه حتي لو كورس دوا ...اكتبه, علشان يتفهم انك عيل ابن اكابر بتقضي الاجازة ما بين مارينا وكورسات الصيف.

واحدة بنت حلال تسالني .. هما يعني الممتحنين هيخيل عليهم الكلام دة..؟

اقول طبعا لا يا قطة.. هما عارفين ان كله قرع.. هو المعيار مش الكفاءة انما مين يقرع تقريعة ما تقرعتش قبل كدة.

واحد ابن حلال يسالني هو انا بعد الهرك دة كله.. هابقي جدير بالوظيفة...؟

اقوله انت نبيه يا ابني والله .. طب وهو حد قالك ان اللي فيها دول جديرين بيها...؟

اهي دايرة وبتدور .. واحد بيمتحن يلزمه واحد يتسال , تلزمه C.V مضروبةعلشان الواحد يتعين .. علشان يجيله يوم ويمتحن واحد هيتسال اللي هيلزمه برده C.V مضروبة علشان.........

كفاية كدة انتوا وجعتوا قلبي معاكوا!!!!

منقووووووووووووووووووووووووووووووووول

هشام هلال من جريدة الدستور