آخر أحلى أيام حياتى
بدأها سعد وختمها عمرو

ياااااااااااااااااااااااااااااااااااااااااااااااااااه ... فاضل يوم واحد بس فى الكلية

تخيلوا !!! أنا لسة فاكر وأنا داخل أول محاضرة فى اعدادى هندسة ..... النهاردة باجهز عشان أدخل آخر محاضرة وآخر سكشن

فعلاً أحلى أيام حياتى ..... بدأها الدكتور/ سعد الصافى ربنا يمسيه بالخير وإن شاء الله يختمها الباشمهندس عمرو عبيد يوم الأحد الجاى

بدايتها سعد ونهايتها عمرو ........ والله كانت خمس سنين من أبدع ما يكون

الحقيقة إن الدكتور سعد الصافى مكنش أول دكتور نشوفه فى الكلية ، الدكتور فاروق البرقى دخلنا قبله يرحب بينا ويكلمنا عن الكلية بس الدكتور سعد كانت أول محاضرة

بصراحة أنا لو كتبت عن الخمس سنين دول حاكتب كتيييييييييير أوى وأنا دلوقت مش مجرد مزنوق .... أنا متبهدل أصلا فى الوقت ... فاضل على الامتحانات 10 أيام ولسة فاضللى مذاكرة كتييييييييير أوى

بس ماكنش ممكن أفوت الفرصة دى ...... دى آخر أيام

بس أنا أحب أذكر أكتر 3 شخصيات لا يمكن أنساهم فى حياتى الدراسية ... د/ يحيى منير، فيزياء اعدادى، م/ محمد الضوى برمجة سنة أولى وتدريب برمجة فى الصيف و د/ نجوى برمجة وكومبيلرز وداتابيز ونظم معلومات

الحقيقة كل شخصية من دول لها من الفضل عليا ما لا يمكن لأحد أن ينساه .... خاصة الباشمهندس محمد ... ربنا يرجعه بالسلامة يا رب

بس برده مفيش أكتب عنهم ولازم استئذنهم الأول طبعاً .... أصلا د/يحيى لو شافنى حيضربنى (ده لو افتكرنى أصلاً) ..... بقالى مدة طويلة أوى مرحتش سلمت عليه

عشان أنجز بقى ... أحب أذكر أجمل لحظات عشتها فى الخمس السنين دول

كنت أول يوم فى العسكرية (خدتها بعد اعدادى على طول) وقالوا النتيجة قربت تتطلع

يوميها رحت فى الاستراحة الكلية وطلعت لدكتور يحيى المكتب أسأله لو فيه أخبار قالى انت مفروض أكتر واحد تكون مطمن فى الدفعة
:D:D

أنا الصراحة مفهمتش قصده إيه خالص لإن اللى هو قالهولى بعد كده كنت لا يمكن أتصوره أبداً

المهم قاللى خلص العسكرية بتاعتك وتعالى أنا مستنيك حاحاول أقولك نتيجتك

خلصت ورحت قاللى مبروك يا عمرو طلعت الأول على الدفعة ..... أنا قلت أكيييييييييييييييييييد بيهزر ..... أيامها مكنتش أعرف إنى شاب دحيح
:D:D

المهم قعدت أقوله كذا مرة لو سمحت يا دكتور عايز أعرف عملت إيه لإنى كنت فعلا مش مصدق ..... لحد ما خدنى لرئيس القسم بنفسه د/ رفعت العطار عشان كان عايز يباركلى .... ولاقيت هناك مجموعة من رؤساء الأقسام اللى قعدوا يباركولى ويتكلموا معايا ... تصوروا أنا بتكلم مع رؤساء أقسام
:D:D

وفى السكة د/ يحيى ودانى لـ د/ مايسة أمين عشان كانت عايزة تشوف الأول على الدفعة .... تصوروا ... عايزة تشوفنى
:D:D

عرفت بعدها إن د/ رشدى زهران (كان أيامها وكيل الكلية وهو دلوقت العميد) اتصل بـ بابا فى البيت عشان يبلغه النتيجة ويباركله...الكلام ده قبل ما نتيجة الدفعة ما تتطلع بيومين بالظبط

:D:Dوبعدها إذاعة اسكندرية سجلت معايا

المهم لاقيت الحقيقة كمية من الاحتفاء والفرح اسعدتنى أكتر من النتيجة اليوم ده

:D:Dوخرجت من الكلية وأنا فى حالة ذهول ... ذهول بمعنى الكلمة ... كنت بجرى فى الشارع والله

طبعا كانت صاعقة فى العائلة من أولها لآخرها ... ماكنش حد مكتشف فيا كده خالص

بس الحقيقة والحق يقال إن الفضل الأول والثانى والثالث والأخير كان لله سبحانه وتعالى .... كان توفيق ربنا فى هذه السنة غير عادى وغير طبيعى

طبعا حصل كذا حدث بعد الحدث الجلل ده .... بس كفاية كد النهاردة بقى

:D:Dربنا يستر فى الامتحانات بقى

!!رجالٌ أم جبابرة ؟

خيركم خيركم لأهله، وأنا خيركم لأهلى ........ مرفوع لرسول الله محمد صلى الله عليه وسلم والله تعالى أعلم

من لا يستطيع أن يقوم بواجب الأب فلا يحق له أن يتزوج ليصير أباً


أحب أن يكون الرجل طفلاً بين أهله .... فإذا أرادوه رجلاً وجدوه رجلاً


الأحكام المطلقة خاطئة ..... افترض دائماً أن رأيك صواب لكنه يحتمل الخطأ


استوصوا بالنساء خيراً ........ مرفوع لرسول الله محمد صلى الله عليه وسلم والله تعالى أعلم


وللحديث بقية إن شاء الله ما دام فى العمر بقية

رجال أم جبابرة

من لا يستطيع أن يقوم بواجب الأب فلا يحق له أن يتزوج ليصير أب


أحب أن يكون الرجل طفلا بين أهله .... فإذا أرادوه رجلا وجدوه رجلا

الناس عملت ايه فى ابليس

على باب سفارة كندا
لمحت ابليس و ف ايده استماره
بقول له على فين
قاللي بص
يا هجره يا اعاره
يا عم زهقت كفرت
الاقيش معاك سيجاره
انا انتهيت خلاص
لا نافع وسواس ولا خناس
ولا ليا عيش وسط الناس
دي عالم مجرمين
عندكوا فائض ف الفساد
في كل البلاد
ومش محتاجين شياطين
مليش عيش ف البلد دي
بقالي سنين عاطل
و انتوا بتعرفوا
تقلبوا الحق باطل
و تسلكوا القاتل
و تمشوا ف جنازة المقتول
ومفيش مشاكل
يا عم ده انا بقيت أوسوس بالمقلوب
و أقول للحرامي كفايه بقى توب
انت هاتعمل كل الذنوب لوحدك
و أنا ابليس
أشتغل واعظ
ولا كمساري ف اتوبيس
يا عم ده انا زمان
كنت استنى حد ينسى
يسمي
وهو بياكل لقمته
دلوقتي كل اكلكم ملوث
و بصراحه الواحد خايف على صحته
ده مفيش ضمير اساسا
عشان اموته
و كل واحد بمزاجه
خربانه ذمته
يا عم ده كل حاجه اتسرقت
وكده الاجيال الجديده
م الحراميه اتظلمت
يا راجل ده من كتر ما لطشت معايا
خرجت ف مظاهره
مع الناس اللي بتقول كفايه
و برضه مفيش فايده

منقووووول

كلمة أوائل الطلبة فى يوم الوفاء والتفوق لعام 2007/2008
كلية الهندسة - جامعة الاسكندرية

بسم الله الرحمن الرحيم

و الصلاة و السلام على سيدنا محمد أشرف المرسلين

أساتذتى الأفاضل, آباءَنا وأمهاتِنا الكرام, زملائى وزميلاتى الأعزاء, السلام عليكم ورحمة الله وبركاته

اليوم ونحن نحتفل بحصاد عام مضى, وجب علينا أن نبدأ بحمد الله وشكره أن رزقنا هذا التفوق, و أن نتوجه بجزيل الشكر إلى أساتذتنا الذين نهلنا منهم العلم وندينُ لهم بالفضل فجزاهم الله خيرًا, وكذلك لآبائنا وأمهاتنا الذين سَهِروا وكدوا وحَرَصوا على راحتنا ولطالما ارتفعت أكفهم بالدعاء لنا, فلهم منا جزيلُ الشكر والعرفان, وأنتم زملائى وزميلاتى لكم أخلص التهانى على ما وصلتم إليه من تفوق وأرجو من الله أن نظل دائمًا على هذا الدرب.

علينا ونحن فى هذا المقام أن نتذكر تاريخنا المجيد وعلماءنا الذين أضاءوا الدنيا و كيف أن العالم أجمع ظل مئات السنين يكتب اختراعاته و علومه باللغة العربية. ولا يكفى أن نتغنى بأمجاد الماضى فليس الفتى من قال كان أبى إنما الفتى من قال ها أنا ذا, كما أنه لا وجود لحلول سحرية تنهض ببلدنا و تعيد مجدنا دون جهد أو تضحية, لذلك علينا أن نكون ناجحين فى حياتنا, و قد قطعنا أولا خطوات هذا النجاح بتفوقنا فى دراستنا وأن نوجه نجاحنا لصالح بلدنا وأن لا نبخل عليه بجهد ولا تضحية , وعندها سيكون لسان حالنا ها أنا ذا.

أوصى نفسى وزملائى بطاعة الله وأن نكون قدوة لمن حولنا ديناً وخلقاً وعلماً وعملا وأن نبر آباءنا وأمهاتنا وأساتذتنا وأن لا ننسى حق أمتنا علينا

والسلام عليكم ورحمة الله وبركاته

إسلام كامل أحمد بلتاجي

قسم هندسة الحاسب

الضمير العربى ... رؤية

العنوان ده اسم أوبريت لسة معروض قريب فى التلفيزيونات العربية ...... آه صح ما أنا فعلا بتكلم عنه ... أصل أنا لسة مخلصه من حوالى 23ّ ثانية تقريبا

الحقيقة الأوبريت تأريخ بسيط لعشر سنين من أبشع ما يكزن فى تاريخ الأمة العربية فضلا عن مسلمى أفغانستان الذين هم أفضل حالاً من العرب بلا شك

طب انا دلوقت حتكلم عن إيه يعنى ..... حوصف الأوبريت مثلا ..... ولا حعقد أعيط على المناظر اللى فيه ..... ولا حقعد اشتم وأقول منكم لله يا حكام العرب ياللى بعته الأرض والبشرو....... ولا أنا بكتب إيه يعنى

كل ده مالوش لزوم أصلا .... ما الأوبريت موجود اللى عايز يشوفه يشوفه .... وعيطنا كتير قبل كده وكل مرة بننسى تانى ونرجع نضحك ولا كأن فيه حاجة حصلت ....... والحكام مش غالطانين لوحدهم بالعكس أنا رأيى الشخصى والله والله والله وقسماً برب العزة الجليل ويمين أتحاسب عليه أدام ربنا يوم الحساب إن احنا غالطانين أكتر منهم ..... كل ده كلام فارغ أصلا وتضييع وقت فى الكتابة والقراية

خلينا نبدأ بنقطة كده ملهاش علاقة بالموضوع بس قد تكون محل لبس ....... هى الأغانى حلال ولا حرام ؟

أنا واحد من الناس معتقد بحرمتها تماما ومش بحب كمان حد يناقشنى فى النقطة دى خالص ........ آه دانتا بتستهبل بقى ...... ازاى حرام وسمعت الأوبرت ...... انت بتهيس يابنى

ممكن تسميها غلطة .... أو سميها أنه من جملة الأخطأ اللى الإنسان ممكن يرتكبها فى حياته بيحاول يخلى شوية غلطات منها يكون لها فايدة أو رسالة ...... أو سميها غفلة فلب ..... أو سميها فضول عشان الأوبرت بقاله فترة الناس بتتكلم عليه .... أو ممكن تعتبر إنه ثقة فى المصدر بتاعه اللى أنا خدته منه ودى كانت أحد الزميلات الفاضلات فى الكلية ..... أو رغبة فى الفوقان مثلا ..... أو فضى وكتر وقت (مع أنا مش فاضى والله) ...... سميها زى ما تسميها ..... بس فى الآخر أنا أقر أمام الله باعتقادى إن الأغانى حرام وأسأل الله أن يعفينى من قليلها فضلا عن كثيرها

خلاص النقطة دى ..... لا طبعا هى مش حلاص بس خلينا نرجع للأوبريت تانى دلوقت

الحقيقة أنا زيي زى أى حد اتفرج على الأوبرت ... الدم نفر فى دماغى وضغطى على وحالتى زى الزفت بصراحة من الصور والمناظر اللى فيه

بس أنا بصيت لعدة نقاط هى دى اللى عايز اتكلم فيها شوية

أول نقطة إن الأوبريت فعلا رائع ومؤثر وده يحسب طبعا لكل واحد اشترك فيه

بس المشكلة بقى إن الوحيدين اللى بتكلموا وينطقوا ويحاولوا يغيروا أو حتى ينبهوا الناس أو يعملوا أى حاجة عدلة فى حياتهم هما المطربين والممثلين يا إما لاعبية الكورة زى ما أبو تريكة ربنا يبارك فيه عمل فى بطولة الأمم الافريقية اللى كانت فى غانا يناير اللى فات

طب وإيه المشكلة فى كده يعنى ...... هما المطربين ولاعبية الكورة دول عالم جاربانين يعنى مش بيستحموا مثلا ..... طب ما هما ناس زيينا يعنى منهم الكويس ومنهم الوحش أكيد

المشكلة إن الطرب والكورة أشياء هامشية فى حياة الأمم خاصة المتخلفة منها .... ما هى أمريكا آهى أخيب مخاليق ربنا فى الكورة وطحنا العالم كله حرب وعلم وتكنولوجيا وكل حاجة

طب ما هى مصر آهى بسم الله ما شاء الله عندها مطربين أد كده فى أد كده ...... ولاعبية كورة من الآخر .... وأندية جامدة جدا .... وبطولات فى كل الرياضات متعدش ...... وفى الآخر ليس لها أى تأثير فعال على أى مستوى عربى أو عالمى كدولة

فالمجالات دى من الأمور التى لا ترفع أمم ولا تضعها

ده طبعا فضلا إن مجال الفن بصفة عامة فيه من المحرمات ما فيه يعنى والله المستعان مما يتناقض مع الرغبة فى العزة والنصر والكرامة والرفعة .... فى الآخر كل ده من عند ربنا سبحانه وتعالى اللى الناس دول بيعصوه ليل نهار

يعنى مينفعش واحدة لابسة كت واقفة تقول موسى وعيسى ومحمد بيرفضوا العدوان ....... أصلا دى قلة أدب إنها تنطق أسماء أنبياء وهى بالوضع ده

أساسا مظهر نساء العرب بهذا الشكل فى حد ذاته خزى وهوان وعدم مروءة وقلة كرامة وإهانة ودياثة .... فا مينفعش إن احنا نجلب العزة بهذا الوضع وإن كنت أشكرهم على مشاركتهم وإحساسهم جزيل الشكر من قلبى فعلاً

بس الحقيقة إن الإعلام والغناء هم من لهم الصوت الأقوى والأقدر على الوصول من غيرهم فى العالم العربى عشان كده المحاولة كانت ناجحة جدا وتستحق الشكر فعلاً

النقطة بقى اللى بطلع بيها من كل اللك والعجن الأخير ده إن لازم الانتفاضة تبقى فى مجالات مؤثرة فى حياة الأمم

يعنى إيه الانتفاضة أصلاً هنا

الانتفاضة يعنى الاحساس بالقضية....... يعنى يقظة الضمير زى ما هما قالوا ...... يعنى تعيش عشان هدف حقيقى هو قضية الأمة ومتفكرش فى نفسك بس .... يعنى لما تخلف عيال تبقى عارف إنك بتربيهم عشان يطلعوا يغيروا وميعبشوش فى الذل والهوان ده ... يعنى تعرف انت إيه الهدف من شغلك ودراستك وكدك وتعبك ....... يعنى تحس إنك مسئول عن واحد مش عارف يدافع عن بيته وأهله فى العراق أو واحدة ابنها اتقطع أدام عينها فى فلسطين

قول ما هما اللى عاملوه فى نفسهم ده هما عمله كذا وكذا ..... خلاص مبقاش ينفع ولا هو وقته دلوقت .... الطوفان بيجرف الكل وحيحط كله تحت رجليه

فى أى مكان انت فيه لازم تكون متميز وشاطر وليك لازمة وليك تأثير عشان هى دى القوة


هو ده اللى خيخليك ممكن تعمل حاجة لما فعلا الأمة تحتاج ويكون ليك لازمة ويوم ما يكون كل واحد له لازمة أكيد لازم نعرف ازاى نكون أقوياء مش المظاهرات والاعتصامات والكلام الفارغ اللى مش بيودى ولا بيجيب ده

القوة فى رأيى تتلخص فى مجالاين العقيدة والعلم

لازم الواحد يراعى المجالاين دول كويس أوى

أمريكا طحنتنا بعلمها .... والدولة الصهيونية ذلتنا بعقيدتها القوية الفاسدة

النقطة التانية ممممممم والله نسيت من كتر الكتابة والكلام والتفكير وللأسف مكنتش كاتبهم

طب معلش إن شاء الله أجمع أفكارى كده وأكمل بكرة عشان احنا دلوقت بعد الفجر وعايز أنام عشان اصحى أصلى الجمعة إن شاء الله

كان هناك طفل يصعب ارضاؤه , أعطاه والده كيس مليء بالمسامير وقال له : قم بطرق مسمارا واحدا في سور الحديقة في كل مرة تفقد فيها أعصابك أو تختلف مع أي شخص

في اليوم الأول قام الولد بطرق 37 مسمارا في سور الحديقة ,
وفي الأسبوع التالي تعلم الولد كيف يتحكم في نفسه وكان عدد المسامير التي توضع يوميا ينخفض,
الولد أكتشف أنه تعلم بسهوله كيف يتحكم في نفسه ,أسهل من الطرق على سور الحديقة

في النهاية أتى اليوم الذي لم يطرق فيه الولد أي مسمار في سور الحديقة
عندها ذهب ليخبر والده أنه لم يعد بحاجة الى أن يطرق أي مسمار
قال له والده: الآن قم بخلع مسمارا واحدا عن كل يوم يمر بك دون أن تفقد أعصابك
مرت عدة أيام وأخيرا تمكن الولد من إبلاغ والده أنه قد قام بخلع كل المسامير من السور



قام الوالد بأخذ ابنه الى السور وقال له
(( بني قد أحسنت التصرف, ولكن انظر الى هذه الثقوب التي تركتها في السور لن تعود أبدا كما كانت ))



عندما تحدث بينك وبين الآخرين مشادة أو اختلاف وتخرج منك بعض الكلمات السيئة, فأنت تتركهم بجرح في أعماقهم كتلك الثقوب التي تراها



أنت تستطيع أن تطعن الشخص ثم تخرج السكين من جوفه , ولكن تكون قد تركت أثرا لجرحا غائرا
لهذا لا يهم كم من المرات قد تأسفت له لأن الجرح لا زال موجودا
جرح اللسان أقوى من جرح الأبدان
الأصدقاء جواهر نادرة , هم يبهجونك ويساندوك.
هم جاهزون لسماعك في أي وقت تحتاجهم
هم بجانبك فاتحين قلوبهم لك
لذا أرهم مدى حبك لهم


> (( الشيء الجيد في الصداقة هو معرفة من الذي يمكن أن تستودعه سرك ويقوم بنصحك ))



> على أي حال سواء كنت معتقد بضرورة هذا أم لا, أقرأ هذه الكلمات التالية وتأملها فربما تكون مفيدة لك في حياتك

> أعطي الناس أكثر مما يتوقعوا

> عندما تقول أحبك فلا بد أن تعنيها

> عندما تقول أنا آسف, أنظر لعيني الشخص الذي تكلمه

> لا تعبث أو تلهو أبدا بأحلام الآخرين

> حب بعمق وبصدق

> لا تعاقب أو تصدر حكما على الآخرين وفقا لما تسمعه عنهم فقط

> اذا سألك أحدهم سؤالا لا ترغب في اجابته

> ابتسم واسأله : لماذا ترغب في معرفه الإجابة؟

> تذكر دائما, الطريق الى النجاح الكبير يتضمنه مخاطر كبيرة

> عندما تخسر لا بد أن تستفيد من خسارتك بأن تعتبر

> احترم ثلاث أشياء
> احترم نفسك
> احترم الآخرين
> احترم تصرفانك وكن مسئولا عنها


> ابتسم عندما ترد على الهاتف
> المتصل سوف يشعر بذلك في صوتك

> اقرأ ما بين الأسطر...


>تذكر أنه في بعض الأحيان لا تنال ما تريد
> وربما تكون محظوظا في ذلك